Gipanawagan pag-usab ni Senador Christopher “Bong” Go ang Department of Health o DOH nga siguruhong hingpit nang magamit ug mahimong operational ang mga natukod nga Super Health Center o SHC sa nagkadaiyang bahin sa nasud, ug dili pasagdan nga mahimong “white elephant” lang.
Gihimo ni Go ang maong panawagan atol sa pagdungog sa Senate Committee on Finance bahin sa national budget sa DOH ug Philippine Health Insurance Corporation o PhilHealth alang sa tuig 2027.
Gipasiugda ni Go, nga Vice Chairperson usab sa Senate Committee on Health, ang iyang suporta sa pondo alang sa DOH ug PhilHealth, tungod kay matod niya, ang matag pondo alang sa sektor sa panglawas usa ka importante nga pagpamuhunan alang sa katawhan.
Matod ni Go, daghan pa sa mga Super Health Center ang wala pa maablihi ug wala pa magamit, imbes nga mapahimuslan dayon sa mga nanginahanglan og serbisyo medikal, ilabina sa mga hilit nga lugar ug kabanwahanan.
Giingon sa senador nga gikinahanglan ang mas maayong koordinasyon tali sa DOH ug mga lokal nga pangagamhanan o LGUs aron masiguro nga mapadagan ug mahimong hingpit nga operational ang mga maong health center.
Matod pa niya, adunay mga LGU nga adunay kapasidad sa pagpadagan ug paggasto alang sa adlaw-adlaw nga operasyon sa SHC, apan daghan gihapon nga gagmay nga lungsod ang kulang sa pondo ug kapasidad aron kini mapadagan.
Nisunod ang panawagan ni Go human gisusi ni Senate President Sherwin Gatchalian ang kahimtang sa mga Super Health Center nga wala pa magamit bisan pa adunay nakalaang pondo niini sa miaging mga tuig.
Ang Super Health Center usa ka medium-sized ug semi-hospital primary care facility nga mas dako kumpara sa kasagarang Rural Health Unit o RHU.
Lakip sa mga serbisyo niini ang silid-panganakan, X-ray, dental services, parmasya, general consultation ug uban pang modernong kagamitang medikal nga kasagarang makita sa ospital.
