Nagpahayag og kabalaka ug kahibulong ang kampo ni kanhi House Speaker Ferdinand Martin Romualdez sa desisyon sa Sandiganbayan nga tangtangon si kanhi Department of Public Works and Highways o DPWH Secretary Manuel Bonoan isip akusado sa kasong plunder nga may kalabotan sa giingong anomalya sa mga flood control project
Matud ni Atty. Ade Fajardo, legal counsel ug tigpamaba ni Romualdez, walay pahayag gikan kang Bonoan o bisan kinsang DPWH engineer o opisyal nga nagdugtong kang Romualdez sa mga iregularidad sa mga flood control project.
Matud ni Fajardo, makapabalaka ang pagtangtang kang Bonoan sa kasong plunder ug graft nga iyang giatubang uban sa ubang mga akusado, lakip si Senador Jinggoy Estrada.
Matud pa niya, sukad nga nagpahigayon og preliminary investigation ang special panel sa Ombudsman batok kang Romualdez, walay bisan kinsang opisyal sa DPWH nga nagpasangil nga nalambigit ang kanhing Speaker sa maong anomalya.
Wala usab kuno’y espesipikong proyekto sa DPWH nga gitumbok diin nanghilabot o migamit og impluwensiya si Romualdez aron paboran ang usa ka contractor.
Tungod niini, matud ni Fajardo, makapatingala kon nganong mahimo nang testigo si Bonoan human kini tangtangon isip akusado sa kaso.
Samtang, gipasiugda ni Fajardo nga wala na kuno’y “credible evidence” batok kang Romualdez human bawion sa lima ka gitawag og “Maleta Boys,” lakip ang nag-unang testigo nga si Orly Guteza, ang ilang mga alegasyon batok sa kanhing Speaker.
Matud pa niya, gisuportahan kini sa mga pahayag sa 25 pa ka ubang testigo nga mikuwestiyon sa mga naunang alegasyon sa 18 ka “Maleta Boys.”
