Giklaro ni Army Colonel Manaros Boransing II atubangan sa Senate impeachment court nga ang certification nga ilang gi-isyu kang kanhi DepEd Undersecretary Michael Poa dili pamatuod nga migamit ang Department of Education og confidential funds alang sa mga kalihokan sa Philippine Army niadtong 2023.
Sa ika-20 nga adlaw sa impeachment trial ni Vice President Sara Duterte, gipangutana ni Aty. Rey Robles si Boransing kon ang maong certification pruweba ba nga naglaan ang DepEd og confidential funds alang sa ilang Youth Leadership Summit o YLS ug Information Education Communication Campaign o IEC.
Mitubag si Boransing nga ang certification nagtumong lamang sa partisipasyon sa DepEd ug ubang stakeholders sa maong mga kalihokan.
Gikumpirma usab ni Boransing nga wala sila nagpamatuod sa certification nga adunay gigasto ang DepEd nga regular, confidential o intelligence funds alang sa mga kalihokan sa Philippine Army.
