Nagsang-at si Senate President Pro Tempore Vicente “Tito” Sotto III og resolusyon nga nanawagan alang sa imbestigasyon sa Senado bahin sa mga hinungdan ug grabeng epekto sa sunod-sunod nga bagyo ug Habagat nga miigo sa Pilipinas.
Sa Senate Resolution No. 631, giingon ni Sotto nga halos matag semana niadtong Agosto 2026 nakasinati ang nasud og mga bagyo ug Habagat nga miresulta sa grabeng pagbaha, pagkansela sa klase ug trabaho, pagka-stranded sa mga commuter, pagsira sa mga negosyo ug pagsulod sa baha sa mga panimalay.
Gipasiugda usab sa senador ang iyang kabalaka sa kalig-on ug pagka-epektibo sa mga pampublikong imprastraktura, ilabina ang mga flood-control project nga gilauman unta nga makapanalipod sa mga komunidad batok sa pagbaha.
Base sa resolusyon, mokabat sa P5.1 bilyon ang gibanabana nga kadaot sa pampubliko ug pribadong imprastraktura, lakip ang mga dalan, tulay ug flood-control structures.
Gihisgutan usab ni Sotto ang mga flood-control project nga wala pa mahuman sa Sablayan, Occidental Mindoro, nga gikatahong nadaot ug nakadugang pa sa kadaot sa lokal nga mga komunidad, ingon man ang pipila ka bahin sa Benguet-Nueva Vizcaya Road nga nahugno tungod sa kusog nga pag-ulan.
