Nanawagan si Senate Minority Leader Alan Peter Cayetano sa mga Pilipino nga magpabiling lig-on ug mokupot sa ilang pagtuo taliwala sa mga hagit nga giatubang sa nasud.
Sa iyang mensahe atol sa ika-44 nga anibersaryo sa Mandaport Apostolic Pentecostals Church kagahapong adlawa, si Cayetano miingon nga ang mga bagyo sa kinabuhi dili kalikayan, apan kadtong adunay lig-on nga pundasyon sa ilang pagtuo makabuntog niini.
Miingon siya nga ang mga hagit nga giatubang sa mga Pilipino naglakip sa mga bagyo ug baha, ingon man ang kawalay trabaho, ubos nga sweldo, pagsaka sa presyo sa mga palaliton ug taas nga presyo sa gasolina.
Gipasiugda usab ni Cayetano nga ang pagtuo adunay kauban nga responsibilidad nga mahimong maayong ehemplo sa komunidad ug ipadayon ang dignidad sa matag tawo, bisan kung adunay dili pagsinabtanay.
Isip kanhi kalihim sa Department of Foreign Affairs, iyang gitandi ang mga Kristiyano sa usa ka embahador nga nagrepresentar sa nasud nga iyang gialagaran ug dili lang sa iyang kaugalingon.
Gilambigit usab ni Cayetano kini nga panan-aw sa pakigbatok sa korapsyon. Miingon siya nga dili ang mga tawo nga nalambigit sa korapsyon ang angay isipon nga personal nga mga kaaway apan ang korapsyon mismo
Sa katapusan, iyang giawhag ang mga Pilipino nga magpabiling lig-on sa ilang pagtuo aron malampasan ang bisan unsang mga pagsulay nga moabot kanila.
