Nagpadayon ang mga awtoridad ug nagkalain-laing mga response team sa ilang search, rescue, ug retrieval operations para sa upat ka mga indibidwal nga nawala human sa pagkahugno sa bahin sa Agana Bridge sa Tarlac City.
Nahitabo ang insidente mga alas 7:40 sa gabii niadtong Agosto 29, sa dihang usa ka Toyota Avanza nga may lima ka pasahero ang naanod sa kusog nga bul-og sa tubig human nahugno ang bahin sa tulay.
Sumala sa mga awtoridad, usa lang sa lima ka pasahero sa sakyanan ang naluwas. Ang nakaluwas giila nga si Nathaniel Dizon, kinsa naluwas sa rescue team human sa insidente.
Nagpadayon pa ang pagpangita sa upat pa ka mga pasahero, sila si Paul Harvey Collado, James Patrick Taborlupa, Shiela Mae Taborlupa, ug Shonen Tuhaw.
Sa pagkakaron, dili luwas ang paggamit og mga sakayan ug mga floating device tungod sa kondisyon sa tubig. Sumala sa mga awtoridad, ang mga rescuer mismo mahimong mabutang sa peligro kung mapugos sila sa paggamit niini samtang kusog ug kusog ang bul-og sa tubig sa suba.
