Gilauman ang pagsaka sa plete sa eroplano sa unang bahin sa bulan sa Septyembre tungod sa pagtaas sa passenger fuel surcharge.
Sumala sa Civil Aeronautics Board o CAB, gipataas ngadto sa Level 13 ang fuel surcharge alang sa mga biyahe gikan Septyembre 1 hangtod 15.
Mas taas kini kumpara sa Level 12 nga gipadapat sa ikaduhang bahin sa Agosto.
Ang fuel surcharge usa ka dugang nga bayranan sa mga pasahero nga gitumong sa pagtabon sa gasto sa mga airline tungod sa pagtaas sa presyo sa jet fuel.
Tungod niini, posibleng madugangan ang kinatibuk-ang plete sa mga pasahero sa domestic ug international flights sugod sa unang bahin sa Septyembre.
Gibag-o na usab sa CAB ang pagpatuman sa fuel surcharge gikan sa binulan ngadto sa matag 15 ka adlaw aron mas masubay ang pagbag-o sa presyo sa aviation fuel.
