Dili makatuo ang usa ka 74-anyos nga babaye sa Australia human ipapanunod kaniya sa iyang landlord ang balay nga iyang giabangan sulod sa kapin 23 ka tuig.
Si Jane Sayner nagpuyo sa two-bedroom unit sa St. Albans, Melbourne sulod sa 23 ka tuig. Ganahan siya sa maong balay tungod sa igo nga luna ug gamay nga tanaman niini.
Wala damha ni Sayner nga mahimong iya mismo ang maong property hangtod nga gitawagan siya sa iyang landlord nga si John Perrett ug gipahibalo nga ipapanunod kaniya ang unit.
Niadtong panahona, anaa na sa nursing home si Perrett samtang nakigbisog batok sa Parkinson’s disease. Usa siya ka kanhi pharmacist, football player, property investor ug philanthropist.
Gawas sa balay nga iyang gibilin kang Sayner, midonar usab si Perrett og 19.6 milyon ka dolyar ngadto sa nephrology department sa Royal Melbourne Hospital, diin kaniadto siya nakaagi og kidney transplant.
Namatay si Perrett sa edad nga 86.
Samtang, malipayon karon si Sayner nga nagpuyo sa balay nga kaniadto iyang giabangan lamang, ug matud niya nga lisod gihapon tuohan ang nahitabo.
Matag adlaw usab niyang gihinumdoman ang kaayo ni Perrett ug mapasalamaton siya sa dakong gasa nga iyang nadawat.
