Magsugod sa Setyembre ang National Food Authority o NFA sa pagpalit og presko ug basang palay sa mas taas nga presyo aron madugangan ang kita sa mga lokal nga mag-uuma.
Matud ni NFA Administrator Larry Lacson, ang bag-ong presyuhan ipatuman usab sa pagsugod sa panahon sa anihan sa nasud, nga gilauman nga makahatag og dugang nga kita ug benepisyo sa mga mag-uuma.
Gikan sa kasamtangang P17 kada kilo, itaas sa NFA ngadto sa P21 kada kilo ang buying price sa basang palay. Nagpasabot kini og dugang nga P4 kada kilo alang sa mga mag-uuma.
Apan giklaro ni Lacson nga sa sinugdanan, limitado lamang ang pagpalit sa mga lugar diin adunay kaugalingong rice drying facilities ang NFA.
Gipasabot nga importante ang drying facilities aron mapauga dayon ang mga palay nga mapalit ug malikayan ang pagkadaot o pagkadunot niini samtang gitipigan sa mga bodega sa ahensya.
Samtang, padayon ang mga field office sa NFA sa nagkalain-laing rehiyon sa pagpangita ug pakigtambayayong sa mga magamit nga drying facilities aron mapalapdan ang pagpalit sa basang palay ngadto sa ubang mga lugar sa nasud.
