Gipanawagan ang mas lig-on nga pagpanalipod sa Sierra Madre Mountain Range human sa makadaot nga flash flood sa Nepal nga nakadaot sa daghang komunidad ug nakapatay og mga tawo.
Matud ni House Speaker Faustino “Bojie” Dy III, pagatrabahoon sa Technical Working Group o TWG ang House Bill 3538, nga nagtumong sa pag-establisar sa Sierra Madre Mountain Range Authority o SMMRA aron mas mapalig-on ang pagdumala ug pagpanalipod sa maong kabukiran.
Sumala ni Dy, ang mga pagbaha nga nasinati sa nagkalain-laing lugar usa ka klarong pahinumdom nga ang kaluwasan sa mga komunidad konektado sa pag-atiman ug pagpanalipod sa kalikupan.
Dili lamang ang Metro Manila ang napanalipdan sa Sierra Madre, kondili apil usab ang mga probinsya sama sa Cagayan, Isabela, Rizal ug Quezon, busa kinahanglan kining ampingan batok sa mga kalihukang mahimong makadaot niini.
Matud pa sa lider sa Kamara, dili lamang imprastraktura ang angay tutukan sa flood control. Importante usab ang pagpanalipod sa mga lasang, watershed ug natural ecosystems tungod kay nagsilbi kini nga unang panalipod batok sa epekto sa grabeng panahon.
Ubos sa maong panukala, ang SMMRA mahimong sentral nga policy, coordinating ug regulatory body nga manguna sa pagdumala sa Sierra Madre Mountain Range.
