Wala tagda sa usa ka pito ka tuig nga batang lalaki sa Estados Unidos ang kainit ug kabug-at sa nagtumpok nga mga sinina human siyang nagsul-ob og 50 ka sweater nga dungan aron makahimo og bag-ong Guinness World Record.
Niadtong Hunyo 1, malampuson nga nakuha ni Skyler Rozell-Whitaker sa Pennsylvania ang rekord alang sa pinakadaghang jumper o sweater nga gisul-ob sa usa ka higayon, human niya malapas ang kanhi rekord nga 46 ka sweater.
Gitabangan si Skyler sa iyang inahan samtang gitan-aw ug gisuportahan siya sa iyang pamilya, mga higala ug kauban sa eskwelahan sulod sa usa ka public library sa Monroeville.
Samtang nagkadaghan ang iyang gisul-ob nga sweater, mas mibug-at ug midako usab ang iyang lawas tungod sa kabaga sa mga sinina. Miangkon siya nga gibati na niya ang sobrang kainit sa ulahing bahin sa hagit, apan gipadayon gihapon niya kini hangtod nga nasul-ob ang ika-50 ka sweater.
Human sa iyang record attempt, nagbinuang si Skyler nga wala na siya makagakos balik sa mga nangumusta kaniya tungod kay halos dili na niya matarong og lihok ang iyang mga bukton.
Mas espesyal ang iyang world record tungod kay dili lamang personal nga pangandoy ang hinungdan sa iyang pagsulay. Plano niyang i-donate ang tanang 50 ka sweater ngadto sa usa ka clothing drive aron makatabang sa mga nanginahanglan.
