Gipasidunggan isip World’s Ugliest Dog 2026 ang usa ka unom ka tuig nga pug nga ginganlan og Jinny Lu sa tinuig nga kompetisyon nga gipahigayon sa Sonoma County Fairgrounds sa Santa Rosa, California.
Si Jinny Lu, nga ikaduha sa maong kompetisyon niadtong miaging tuig, maoy napili nga mananaog karong tuiga.
Gisaulog sa maong kalihokan ang ika-50 nga anibersaryo niini, nga nagtumong sa pagpasidungog sa talagsaong katahom sa mga iro, ingon man sa pagpasiugda sa pag-amuma, pagluwas ug pag-adopt sa mga hayop.
Nasayran nga giluwas si Jinny Lu gikan sa dog meat trade sa South Korea ug gidala sa Estados Unidos alang sa adoption pinaagi sa duha ka rescue groups sa California. Upat ka tuig na ang milabay sukad nga siya gi-adopt ni Michelle Grady, residente sa Ukiah.
Nakadawat sila ni Grady og trophy ug $5,000 nga premyo, samtang ang nawong ni Jinny Lu ipakita usab sa limitado nga edisyon sa mga lata sa Mug root beer.
Nakuha sa albino Chihuahua-Pomeranian mix nga si Pinky ang ikaduhang pwesto ug $3,000 nga premyo, samtang ikatulo si Otto, usa ka Chihuahua mix, nga nakadawat og $2,000.
