Gidakop sa mga awtoridad sa Estados Unidos ang usa ka 35-anyos nga babaye sa New York tungod sa pagplano matod pa og pag-atake nga inspirado sa Islamic State o ISIS sa state capitol building sa Albany.
Giila ang suspek nga si Jessica Bowie, 35, residente sa Albany. Sumala sa U.S. Department of Justice, gipasakaan siya og kaso tungod sa pagplano nga magbutang og eksplosibong aparato sa state capitol aron patyon ang mga opisyal sa gobyerno ug gub-on kutob sa mahimo ang building.
Matud sa DOJ, plano usab ni Bowie nga mokalagiw paingon sa teritoryong kontrolado sa ISIS sa Syria human sa pag-atake. Nasikop si Bowie ning Miyerkules human niya makuha ang iyang gituohang eksplosibong aparato. Matud sa mga awtoridad, namatikdan usab siya nga mibisita sa palibot sa state capitol ug mikuha og mga litrato sa building.
Sumala pa sa DOJ, giila ni Bowie ang building isip iyang target ug miingon matod pa nga gusto niyang adunay epekto ang iyang gihimong pag-atake sa sistema sa Amerika.
Gibutyag usab sa departamento nga nakapahayag si Bowie og mga anti-American nga mensahe online, lakip ang pagsaulog sa mga pag-atake niadtong Septiyembre 11, 2001, diin gi-hijack sa mga militanteng al Qaeda ang mga commercial airplane ug giguba ang World Trade Center ug Pentagon, samtang usa ka eroplano nahagsa sa Pennsylvania.
Wala pa makahatag og pamahayag ang abogado ni Bowie. Human sa pagdakop sa suspek, miingon si New York Governor Kathy Hochul nga gipalig-on sa estado ang seguridad sa capitol ug sa ubang pasilidad sa gobyerno tungod sa pagtaas sa mga insidente sa politikanhong kapintasan ug hulga batok sa mga opisyal.
Matud ni Hochul, wala pay gilayong hulga sa pagkakaron apan magpadayon ang ilang koordinasyon sa mga law enforcement agency aron mapanalipdan ang mga residente ug komunidad.
