Giapil ni kanhi House Speaker Martin Romualdez ang recantation sa giingong bagman nga si Orly Guteza, diin iyang gibawi ang iyang alegasyon batok sa kongresista nga siya matod pa naghatod og kickback.
Gikumpirma usab ni Atty. Felix Villa, usa sa mga abogado ni Romualdez, ang pagsumite sa maong affidavit niining Huwebes sa hapon, Agosto 20.
Una nang giingon sa laing abogado ni Romualdez nga si Atty. Ade Fajardo nga ilang gilakip sa supplemental counter-affidavit ang gipanumpaang mga pahayag sa 25 ka kanhi driver ug security aide sa pugante ug kanhi kongresista nga si Elizaldy Co.
Gibarugan ni Romualdez nga wala siyay nahimong bisan unsang ilegal ug andam siyang pamatud-an kini human mismo nga gipahibalo sa iyang ig-agaw nga si Pangulong Ferdinand Marcos Jr. sa iyang ikalima nga SONA nga pagasakaan og kaso ang kongresista.
Kahinumduman nga kaniadto gibutyag ni Guteza sa pagdungog sa Senate Blue Ribbon Committee niadtong Septyembre 2025 nga naghatod siya og mga maleta nga adunay sulod nga kuwarta ngadto sa balay ni Romualdez sa Taguig.
Apan sa ulahi, gibawi niya ang iyang alegasyon ug miingon nga gipugos siya nila kanhi Cong. Mike Defensor ug Senador Rodante Marcoleta aron buhaton kini.
Samtang, giingon sa Office of the Ombudsman nga ipadayon gihapon niini ang imbestigasyon batok kang Romualdez bisan pa sa pagbawi sa mga testimonya.
