Gipahamtangan og temporaryong suspensiyon sa Bureau of Customs (BOC) ang opisyal sa port police sa Zamboanga City, ang amahan sa estudyanteng suspetsado sa pagpamusil sulod sa junior high school campus sa Ateneo de Zamboanga University.
Gikumpirma kini ni Customs Deputy Chief of Staff Atty. Chris Bendijo.
Matud niya, ipailalom sa imbestigasyon ang maong empleyado aron matino ang posibleng responsibilidad o pananagutan niini kalabot sa insidente.
Base sa unang imbestigasyon, nadiskobrehan nga ang pusil nga gigamit sa estudyanteng suspetsado sa pagpamusil gipanag-iya sa iyang amahan.
Duha ka armas nga taas og kalibre ang giingong gigamit sa suspetsado sa krimen, usa ka 9mm pistol ug usa ka M16 rifle.
Samtang, wala na maghatag og dugang detalye ang Bureau of Customs kalabot sa maong insidente.
Una nang gikumpirma sa Police Regional Office 9 nga duha ka estudyante ang kumpirmadong namatay, lakip ang mismong shooter nga mipusil sa iyang kaugalingon human sa pagpamusil sulod sa campus.
