Gikatakdang magpagawas og desisyon ang Senate Impeachment Court kalabot sa gihisgutan nga isyu sa “misleading questions” nga nahimong mainiton nga hisgutanan atol sa ika-15 nga impeachment trial batok kang Vice President Sara Duterte.
Sa pagpadayon sa pagtaral karong Lunes, Agosto 17, wala sa makausa tugoti ni Trial Presiding Officer Francis “Chiz” Escudero si Atty. Amando Ligutan nga mohimo og manifestation, ug miingon nga hatagan kini og higayon sa hustong panahon aron ipasabot ang iyang panig.
Kini human gihangyo ni House Prosecutor Joel Chua ang korte nga tugotan si counsel for prosecution Atty. Amando Ligutan nga mohimo og manifestation kalabot sa iyang post online bahin sa “misleading questions.”
Matud pa, nahimong mainiton ang maong isyu tali sa prosekusyon ug depensa human miingon si counsel for defense Atty. Kristine Ferrer nga gitugotan ang “misleading questions” atol sa cross-examination sa testigong si Xylene Del Campo, nga gisupak sa prosekusyon.
Human niini, nag-post si Atty. Ligutan sa iyang social media account nga bawal ang “misleading questions” bisan pa sa cross-examination o pagpangutana sa testigo sa pikas nga kampo.
Mibarog batok niini ang Lead Defense Counsel nga si Atty. Sheila Sison ug miingon nga “troubling” o makapabalaka ang maong post tungod kay daw gitumong niini si Atty. Ferrer human sa mainit nga panaglalis tali niini ug ni Private Prosecutor Lorna Kapunan.
Gipasabot usab ni Atty. Sison nga wala nagpasabot si Atty. Ferrer nga gitugotan ang “misleading questions” sa cross-examination. Matud niya, ang tinuod nga gipasabot ni Ferrer mao ang “leading questions,” o mga pangutana nga kasagarang matubag lamang og “Oo” o “Dili.”
