Nanawagan si Senate Labor Committee Chair Joel Villanueva sa Department of Labor and Employment (DOLE) nga maglatag og temporaryong programa alang sa mga minimum wage earners samtang pending sa korte ang pagpatuman sa P85 wage hike sa Metro Manila.
Sumala ni Villanueva, dili angay nga mas maipit pa ang mga trabahante samtang giklaro ang mga legal nga isyu kalabot sa wage order, ilabina sa padayon nga pagsaka sa presyo sa pagkaon ug krudo.
Giinsistir sa senador nga dako na kaayo og panginahanglan ang mga trabahante sa dugang-sahod tungod kay dili na matod pa igo ang kasamtangang minimum wage alang sa desente nga panginabuhi.
Gipahayag usab ni Villanueva ang iyang suporta sa National Wages and Productivity Commission (NWPC) ug Regional Tripartite Wages and Productivity Board-NCR sa ilang pagpangayo og tukmang remedyo ngadto sa Office of the Solicitor General.
Dugang pa niya nga kinahanglan magpabilin ang tripartite wage-setting mechanism nga gimugna ubos sa Republic Act No. 6727, imbes nga moabot pa sa taas nga proseso sa korte ang isyu bahin sa pagtakda sa sweldo.
Matod ni Villanueva, ang wage hike kinahanglan hisgutan taliwala sa mga trabahante, management ug gobyerno base sa aktuwal nga panginahanglan, ug dili angay malangan tungod lamang sa proseso sa litigasyon.
