Giduso ni Parañaque 2nd District Representative Brian Yamsuan ang usa ka panukalang balaod nga magpataas sa sweldo sa mga Special Needs Education o SNed teachers aron matubag ang kakulang sa mga magtutudlo alang sa mga estudyanteng adunay kapansanan.
Ubos sa House Bill 5574, ipataas gikan sa Salary Grade 14 ngadto sa Grade 16 ang minimum salary grade sa mga SNed teachers sa mga pampublikong eskwelahan.
Katumbas kini sa basic pay nga P45,694 matag bulan karong tuiga ug P47,829 pagsapit sa 2027.
Matud ni Yamsuan, gikinahanglan ang igo nga gidaghanon sa mga SNed teachers aron matagaan og patas nga oportunidad sa edukasyon ang mga estudyanteng adunay kapansanan.
Base sa datos, adunay 391,089 ka learners with disabilities (LWDs) nga naka-enroll sa mga pampublikong eskwelahan niadtong school year 2024-2025, apan wala pa mokabat og 6,000 ang SNed teachers nga nag-alagad kanila.
Matud pa ni Yamsuan, adunay gibana-banang 600 ka bag-ong SNed teaching positions nga gibuhat sa Department of Education o DepEd karong tuiga, apan wala pa kini mapun-an tungod kay gihulat pa ang bag-ong qualification standards gikan sa Civil Service Commission o CSC.
Nanawagan ang magbabalaod sa CSC nga paspason ang proseso, samtang gihangyo usab ang Kongreso nga ipasa ang panukalang balaod alang sa dugang-sweldo aron mas daghang SNed teachers ang maenganyo ug mapabilin sa mga pampublikong eskwelahan.
