Namatay sa edad nga 25 anyos ang Miss Earth Indonesia 2025 nga si Putri Andriani Juficha, nga nailhan usab isip runner-up sa Miss Grand Indonesia 2025.
Gipahibalo sa Miss Grand Indonesia organization ang iyang kamatayon pinaagi sa Instagram ug nagpahayag og dakong kasubo sa pagkawala sa beauty queen.
Gihinumdoman siya sa organisasyon isip kabahin sa ilang “Grand family” ug usa ka matahum nga tawo nga nakahatag og inspirasyon sa daghang katawhan. Nagpahayag usab sila og pakig-uban sa kasubo ug pag-ampo alang sa iyang pamilya ug mga minahal sa kinabuhi.
Ang kataposang Instagram post ni Putri kay niadtong Hulyo 21, diin iyang gipaambit ang pipila ka mga litrato sa iyang kaugalingon.
Gipahibalo ang iyang kamatayon niadtong Biyernes, Agosto 14, nga mao unta ang iyang ika-26 nga birthday, apan wala pa gipadayag ang hinungdan sa iyang pagkamatay.
