Nag-andam na ang Philippine Crop Insurance Corp. o PCIC og kapin P36 milyon nga insurance payouts alang sa 5,005 ka mag-uuma nga nadaot ang mga pananom tungod sa Bagyong Luis ug Maymay, ingon man sa Southwest Monsoon o Habagat gikan Agosto 1 hangtod 11, 2026. Sumala sa Department of Agriculture o DA, mokabat sa P35.67 milyon ang inisyal nga gibanabanang insured damages sa unom ka rehiyon.
Pinakadaghan ang mga apektadong mag-uuma sa Region III o Central Luzon nga mikabat sa 1,836. Gisundan kini sa Region I nga adunay 1,218 ug Region IV-B nga adunay 836 ka mag-uuma.
Sa mga pananom, pinakadako ang insured losses sa palay nga mikabat sa P25.60 milyon. Gisundan kini sa high-value crops nga P3.73 milyon ug mais nga P3.55 milyon.
Giingon sa DA nga gimobilisa na sa PCIC ang mga regional office niini aron ma-validate ang aktuwal nga kadaot ug mapaspas ang pagproseso sa mga insurance claims.
Sumala ni Agriculture Secretary Francisco Tiu Laurel Jr., importante nga dali nga matabangan ang mga mag-uuma ug mananagat human sa matag kalamidad aron paspas silang makabangon ug makapadayon sa ilang panginabuhian.
Samtang, giingon ni PCIC President Jovy Bernabe nga naggamit na usab sila og bag-ong teknolohiya aron mapaspas ang assessment sa kadaot ug ang pagpagawas sa insurance assistance.
Apan gipahibalo sa PCIC nga mahimo pa mausab ang inisyal nga mga numero samtang nagpadayon ang field validation sa aktuwal nga kadaot sa mga lugar nga naapektuhan.
