Misaka og duha ka puwesto ang Filipina tennis ace nga si Alex Eala aron maabot ang iyang bag-ong career-high nga World No. 18 sa WTA live rankings.
Aduna na karon si Eala og 2,166 puntos sa wala pa ang iyang debut sa prestihiyosong Cincinnati Open.
Nakatabang sa pagsaka sa ranggo sa 21-anyos nga Filipina ang pagkunhod sa puntos nila Jasmine Paolini ug Ekaterina Alexandrova gikan sa ilang mga resulta sa Cincinnati ug Monterrey niaging tuig.
Base sa live rankings, nawad-an og 649 puntos ang kanhi World No. 15 nga si Paolini human siya nahimong runner-up sa Cincinnati niaging tuig. Tungod niini, nahulog siya sa No. 20 nga adunay 2,124 puntos.
Samtang, nawad-an usab og 375 puntos si Alexandrova tungod sa iyang pag-abante sa Round of 16 sa Cincinnati, diin nakakuha siya og 120 puntos, ug pag-abot sa finals sa Monterrey Open, diin nakakuha siya og 255 puntos niaging tuig.
Tungod niini, nahulog siya gikan sa No. 18 ngadto sa No. 19.
Nahimo ang pag-uswag sa ranggo human sa impresibong mga semana ni Eala sa North American hard-court swing, lakip na ang iyang makasaysayanong pagkadaog sa kampeonato sa Washington sa Mubadala DC Open, diin iyang gipildi ang mga bantugang magdudula sama nila Qinwen Zheng, Leylah Fernandez ug Naomi Osaka.
Isip No. 17 seed sa torneyo, nakadawat si Eala og first-round bye.
Atubangon niya si Elena-Gabriela Ruse sa Romania sa iyang opening match sa Round of 64
