Nagpahigayon na og imbestigasyon ang Mabuhay Police Station sa General Santos City Police Office kabahin sa usa ka viral video sa Facebook diin usa ka lalaki ang matud pa nagpaila nga usa ka pulis sa Barangay Mabuhay ning dakbayan.
Sumala sa inisyal nga impormasyon nga nakalap sa mga awtoridad, ang driver sa usa ka pick-up vehicle ang giingong nagpaila nga miyembro sa PNP atol sa ilang insidente. Human sa maong panghitabo, nag-estorya ang duha ka habig diin niangkon ug nangayo og pasaylo ang suspek, nga gidawat ra usab sa reklamante.
Apan luyo sa ilang personal nga pag-areglo, gipahayag sa Philippine National Police (PNP) nga magpadayon gihapon ang ilang kaugalingong imbestigasyon aron matino ang saktong lakang ug silot sumala sa gilatid sa balaod.
Gipahimangnoan sa PNP nga walay gihatag nga konsiderasyon o pagtugot sa bisan kinsa nga magpaila o mang-angkon og awtoridad isip pulis nga walay legal nga katungod.
Matud pa sa kapulisan, ang maong binuhatan makadaot sa pagsalig sa publiko ug sa kredibilidad sa mga legitimo nga opisyal sa balaod.
