Gikumpirma sa Department of Education (DepEd) nga kapin sa 2,424 ka classroom ang nadaot tungod sa pag-igo sa Bagyong Maymay ug habagat.
Base sa datos sa Disaster Risk Reduction and Management Service sa DepEd, 403 ka classroom ang hingpit nga naguba, 505 ang grabeng nadaot, samtang 1,516 ang adunay gamay nga kadaot.
Narekord ang mga nadaot nga classroom sa Ilocos Region, Cordillera Administrative Region ug Central Luzon.
Gawas niini, gitaho usab sa ahensya nga adunay mga kagamitan nga nadaot, lakip ang mga lingkoranan, information and communications technology equipment ug learning materials, nga nakaapekto sa pagpadayon sa klase sa mga apektadong lugar.
Samtang, sumala sa DepEd DRRMS, mokabat sa kapin P74 milyon ang gikinahanglang pondo alang sa pag-paayo sa 1,516 ka classroom nga nakaangkon og partial damage.
Isip tubag niini, miingon si Education Secretary Sonny Angara nga maglusad ang DepEd, kauban ang Department of Labor and Employment (DOLE), og 2026 Tulong Panghanapbuhay sa Ating Disadvantaged Workers-Brigada Eskwela isip immediate disaster cleanup mechanism alang sa paghinlo ug pag-ayo sa mga classroom nga naapektuhan.
Una niini, gisuspinde niadtong Lunes ang klase sa daghang lugar sa nasud tungod gihapon sa padayon ug kusog nga pag-ulan nga misangpot sa pagbaha.
