Gidili na hangtod sa hangtod si kanhi Ateneo Blue Eagles head coach Tab Baldwin sa tanang kalihokan sa UAAP human sa desisyon sa UAAP Board niadtong Biyernes.
May kalabotan kini sa team-building activity sa Ateneo basketball team sa Dipaculao, Aurora niadtong Hunyo 8 diin namatay tungod sa pagkalumos ang duha ka players nga sila Rene Clert Baterbonia ug Chukwuemeka Divine Adili.
Matud sa UAAP Board, gibase ang ilang desisyon sa internal investigation sa Ateneo ug sa mga report gikan sa PNP-CIDG ug NBI kabahin sa maong insidente.
Gawas kang Baldwin, gisuspenso usab ang team manager, mga assistant coach ug physical therapist sa Blue Eagles, samtang ang maong silot magpabilin hangtod adunay dugang nga desisyon ang UAAP Board.
Bisan pa niini, magpadayon ang pag-apil sa Ateneo Blue Eagles basketball team sa umaabot nga UAAP Season 89.
