Mipadayag si kanhi presidential spokesperson Atty. Harry Roque nga adunay usa nga “nang-hudas” o nagtraydor kang Senador Ronald “Bato” Dela Rosa, taliwala sa mikaylap nga balita nga giingong nadakpan na ang senador tungod sa arrest warrant gikan sa International Criminal Court (ICC).
Sa usa ka post sa social media niadtong Martes, Agosto 4, gipahayag ni Roque ang mensahe nga, “Meron nga daw na nang-hudas kay Bato.”
Apan wala maghatag si Roque og dugang detalye o nagpangalan kung kinsa ang iyang gipasabot nga maoy nagtraydor sa senador.
Samtang, gipanghimakak sa pipila ka ahensya sa gobyerno ang mga mikaylap nga balita nga nadakpan na si Dela Rosa.
Matud sa National Bureau of Investigation (NBI), Philippine National Police (PNP), ug Department of the Interior and Local Government (DILG), wala silay nadawat nga opisyal nga impormasyon o kumpirmasyon kabahin sa giingong pagdakop sa mambabatas.
Si Dela Rosa usa sa mga ginganlan sa ICC isip usa sa mga giakusahan nga co-perpetrators ni kanhi Pangulong Rodrigo Duterte sa kaso nga crimes against humanity, may kalabotan sa papel niini sa kampanya batok ilegal nga droga atol sa administrasyong Duterte.
