GENSAN- Gihulagway ni Atty. Gerard Wang nga adunay maayong punto ang ika-5 nga State of the Nation Address ni Pangulong Ferdinand Marcos Jr. apan iyang giingon nga nakulang kini sa pipila ka importanteng aspeto ilabina sa isyu sa accountability ug pagpanubag sa mga alegasyon sa korapsyon.
Matud ni Wang, nakita niya sa SONA ang paningkamot sa Pangulo nga mapalambo ang national unity ug ang identidad isip mga Pilipino. Giila usab niya ang paghisgot sa mga isyu sama sa kuryente, territorial integrity, ug national sovereignty sa Pilipinas.
Apan sumala sa abogado, nabitin siya tungod kay wala kaayo natandog sa Pangulo ang isyu sa pagpanubag sa mga opisyal nga giakusahan sa korapsyon ug uban pang kontrobersiya nga nalambigit sa administrasyon.
Kung hatagan og grado ang SONA, miingon si Wang nga dili kini makapasar base sa iyang personal nga pagtimbang-timbang tungod kay kulang kini sa mas lig-on nga mensahe bahin sa accountability.
Matud niya, isip labing taas nga opisyal sa nasud, kinahanglan ang Presidente maoy manguna sa pagpasiugda sa maayong ehemplo ug pagpanubag sa mga opisyal sa gobyerno nga giakusahan sa sayop nga mga buhat.
Dugang pa ni Wang, kulang usab ang SONA sa mas lawom nga pagpasabot sa mga polisiya sa gobyerno, ilabina sa edukasyon ug uban pang sektor, tungod kay wala kaayo gipakita ang mga numero ug konkretong datos nga makatabang sa publiko sa pagsabot sa kahimtang sa nasud.
Iyang gipasiugda nga ang SONA usa ka higayon alang sa Presidente nga ipakita ang mga polisiya ug plano sa tanang aspeto sama sa langyaw nga relasyon, edukasyon, enerhiya, lokal nga pangdumala, agrikultura, ug trabaho.
Matud niya, daghan gihapon nga sektor ug grupo ang nangayo og tubag gikan sa administrasyon, apan iyang nakita nga adunay kakulang sa mas detalyado nga tubag gikan sa Pangulo atol sa iyang ika-5 nga SONA.
