Gi-refer sa House committee on the welfare of children ngadto sa Technical Working Group (TWG) sa House committee on the welfare of children ang balaodnon nga gisugyot ni House Speaker Faustino “Bojie” Dy III ug House Majority Leader Sandro Marcos nga nagdili sa mga bata nga nag-edad og 13 paubos sa pagbaton og mga social media account.
Gawas sa pagdili sa mga bata sa pagbaton ug pagmentinar sa mga social media account, ang House Bill (HB) 9965 o ang Children’s Social Media Safety Act nagtumong usab sa paghimo sa digital literacy nga mandatory sa basic education, aron mapanalipdan sila sa online world.
Tungod niini, ang Department of Information and Communications Technology (DICT) ug ang Department of Education (DepEd) magtinabangay aron paghimo og “Digital Literacy and Ethical Use of Social Media” module sa K to 12 curriculum.
Giingon usab sa balaodnon nga ang mga batan-on nga sobra sa 13 anyos ug ubos sa 18 anyos mahimong maka-access apan kinahanglan una nga aprubahan sa ilang mga ginikanan o guardian sa dili pa magbaton og mga account sa bisan unsang mga platform.
Kinahanglan usab nga mohatag og mga himan ang mga kompanya sa social media ngadto sa mga ginikanan ug tigbantay sa mga batan-on aron ilang mabantayan ang mga kalihokan sa mga batan-on sa online nga kalibutan.
