Nakabalik na sa nasud ang dose ka Pilipinong biktima sa human trafficking gikan sa Cambodia kagahapong adlawa Hulyo 15, sumala sa Department of Migrant Workers.
Sumala sa DMW, ang mga Pilipino miabot sakay sa Philippine Airlines Flight PR 2622 sa Ninoy Aquino International Airport (NAIA) Terminal 1.
Gipasalig ni DMW Secretary Hans Leo Cacdac nga ang gobyerno motabang sa mga biktima sa ilang reintegration sa Pilipinas.
Gihatagan sa gobyerno ang 12 ka indibidwal og tabang sa airport, tabang pinansyal, transportasyon, ug temporaryong akomodasyon sa hotel.
Gikatakda usab silang makadawat og legal nga tabang human sila makapahulay sa dili pa mobalik sa ilang tagsa-tagsa ka probinsya.
Gipahimangnoan pag-usab sa DMW ang publiko nga magbantay sa mga tanyag sa trabaho nga makita sa social media ug sigurohon nga ang mga oportunidad sa trabaho sa gawas sa nasud lehitimo aron malikayan nga mabiktima sa human trafficking o ilegal nga recruitment.
