Mibisita si Presidente Ferdinand “Bongbong” Marcos Jr. sa Navotas Fish Port Complex sa Navotas City niadtong Sabado aron susihon ang operasyon ug padayon nga rehabilitasyon sa pasilidad isip kabahin sa paningkamot sa gobyerno sa pagpalig-on sa seguridad sa pagkaon ug panginabuhian sa mga mananagat.
Kauban sa Presidente si Agriculture Secretary Francisco Tiu Laurel Jr. Matud ni Marcos, ang Navotas Fish Port Complex usa sa labing importante nga sentro sa pagpanaug ug pagbaligya sa isda sa nasud, busa personal niyang gisusi ang nagpadayon nga rehabilitasyon sa mga pasilidad niini aron masiguro nga makatubag kini sa nagkadako nga panginahanglan sa sektor sa pangisda.
Dugang pa sa Presidente, ang moderno ug hapsay nga pantalan makatabang sa mas luwas ug episyenteng operasyon, nga magpalambo sa panginabuhian sa mga mananagat, negosyante ug uban pang nagtrabaho sa industriya.
Nagtuo usab si Marcos nga pinaagi sa maayong imprastraktura, mapadayon ang igo ug dekalidad nga suplay sa isda ug uban pang pagkaon alang sa publiko.
