Nagpahinumdom ang Bangko Sentral ng Pilipinas o BSP ang mga Pilipino nga kinahanglan nang sayo nga mag-andam alang sa ilang pagretiro tungod kay dili igo ang kasamtangang buwanang pensyon aron matubag ang tanang panginahanglanon sa usa ka retirado.
Matud sa BSP, usa sa mga paagi aron madugangan ang pondo sa umaabot mao ang pag-apil sa Personal Equity and Retirement Account o PERA, usa ka boluntaryong programa sa pagtipig ug pagpamuhunan nga gitumong alang sa dugang nga seguridad pinansyal sa panahon sa pagretiro.
Pinaagi sa PERA, ang mga kontribyutor makahimo og dugang nga retirement fund gawas sa ilang madawat gikan sa mga pension system sama sa SSS ug GSIS. Adunay usab kini mga benepisyo sa buhis alang sa mga kwalipikadong miyembro.
Gidasig sa BSP ang publiko nga dili maghulat nga moabot ang edad sa pagretiro bago magtigom, hinunoa magsugod og andam samtang sayo pa aron mas lig-on ang pinansyal nga kahimtang sa umaabot.
