Magpabilin si Senador Rodante Marcoleta sa kustodiya sa Philippine National Police General Hospital tungod sa iyang dili lig-on nga kahimtang sa panglawas, matod sa mga opisyal sa pulisya kagahapong adlawa.
Matud ni Lt. Col. Benaly Bayani, hepe sa Internal Medicine sa PNPGH, nga base sa pinakabag-o nga resulta sa medikal, si Marcoleta adunay taas nga kolesterol, dugang sa mild pneumonia ug degenerative disc disease.
Sumala ni Bayani, dili pa klaro kung unsa ka dugay magpabilin si Marcoleta sa PNP General Hospital tungod kay ang iyang presyon sa dugo nagpadayon sa pag-usab-usab ug ang iyang kondisyon kinahanglan nga bantayan, labi na kay siya 72 anyos na.
Dugang niya nga kung makompleto na ang mga resulta sa laboratoryo ug medikal nga pagsulay, maghulat sila sa rekomendasyon sa mga doktor sa rehabilitasyon kung kinahanglan ba ni Marcoleta ang dugang nga pagtambal.
