Pormal nang gikasohan sa Office of the City Prosecutor sa Maynila og cyber libel si kanhing Cavite 4th District Representative Kiko Barzaga.
May kalabotan kini sa usa ka Facebook post nga giingong gipatik ni Barzaga niadtong Enero nga naglambigit sa pipila ka mga miyembro sa National Unity Party (NUP) sa giingong pagdawat og suhol.
Partikular nga gihisgutan sa maong post si Manila 2nd District Representative Rolando Valeriano.
Matud sa prosekusyon, kaylap nga mikatag ang maong pahayag tungod kay adunay gibanabanang 1.9 milyon ka followers ang Facebook page ni Barzaga, ug gipaambit usab kini sa pipila ka online news platforms.
Giatubang ni Barzaga ang kasong paglapas sa Cybercrime Prevention Act of 2012, kalabot sa Articles 353 ug 355 sa Revised Penal Code.
Girekomenda usab sa Office of the City Prosecutor ang piyansa nga P10,000 alang sa iyang temporaryong kagawasan samtang nagpadayon ang pagdungog sa kaso.
Si Barzaga mao ang kanhing representante sa ika-upat nga distrito sa Cavite sa wala pa siya matangtang sa puwesto.
Samtang, wala pa’y gipagawas nga pahayag ang iyang kampo bahin sa kasong gisang-at batok kaniya.
Kahinumdoman nga niadtong Abril, una nang giatubang ni Barzaga ang kasong cyber libel human siya kasohan sa negosyanteng si Enrique Razon.
