Gipanghimakak sa Malacañang ang alegasyon nga adunay impluwensiya si Pangulong Ferdinand Marcos Jr. sa imbestigasyon sa National Bureau of Investigation (NBI) may kalabotan sa giingong hulga ni Vice President Sara Duterte batok sa kinabuhi sa Pangulo.
Matud ni Palace Press Officer Usec. Claire Castro, dugay nang ubos sa Department of Justice ang NBI ug kabahin sa ehekutibo ang DOJ, busa dili angay kuwestiyonon ang maong estruktura.
Iyang gipasabot nga adunay kaugalingong mandato ang NBI aron magpahigayon og imbestigasyon sa bisan unsang hulga batok sa Pangulo.
Matud usab ni Castro nga seryoso nga gitagad ni Pangulong Marcos ang pahayag sa Bise Presidente ug wala kini niya pasagdi.
Iyang giingon nga importante ang pag-imbestigar sa maong isyu aron masiguro ang seguridad sa Pangulo, sa Unang Ginang, ug sa kanhi House Speaker, ingon man ang kaayohan ug kaluwasan sa nasud.
