Gi-archive na sa Sandiganbayan 7th Division ang kaso nga graft batok sa mi-resign nga kongresista ug pugante nga si Elizaldy “Zaldy” Co.
Kini human milapas na og kapin unom ka bulan sukad nga nagpagawas ang korte og warrant of arrest apan wala gihapon siya madakpi ug anaa sa kustodiya sa mga otoridad.
Una nang giuli sa National Bureau of Investigation ang Return of Warrant human napakyas pagpangita kang Co sa mga address nga nakabutang sa warrant of arrest.
Gipatin-aw sa Integrated Bar of the Philippines nga ang pag-archive sa kaso usa ka normal nga lakang sa korte ug dili nagpasabot nga gi-dismiss na ang kaso.
Sumala sa IBP, gihimo kini aron dili malangan ang mga iskedyul sa korte samtang wala pa madakpi ang akusado.
Si Co nag-atubang og kaso nga graft may kalabotan sa giingong maanomalyang ₱289 milyon nga flood control project sa Oriental Mindoro. Gikonekta usab siya sa Office of the Ombudsman sa Sunwest Incorporated, nga usa sa mga kontraktor sa maong proyekto.
Sumala sa IBP, magpabiling nakatanggong ang kaso ug dayon ra kini madungog kung madakpan o kusang mosurender si Co. Tungod kay giisip siyang pugante, dili usab mapapas ang kaso bisan pa molungtad ang iyang pagtago.
Sa pinakabag-o nga impormasyon sa gobyerno, gituohan nga naa si Co sa France ug nangayo og asylum didto. Samtang, giingon ni Interior Secretary Jonvic Remulla nga gi-review pa sa gobyerno ang desisyon sa Sandiganbayan.
