Mahimong mulungtad ang rescue operation alang sa mga biktima sa duha ka linog nga miigo sa Venezuela og mga bulan, dili lang mga semana.
Sumala ni Elinor Raikes, bise presidente ug pangulo sa paghatud sa programa alang sa International Rescue Committee (IRC), ang ilang organisasyon karon nangita og alternatibong mga paagi aron mapadali ang pag-apod-apod sa mga hinabang ug mga kinahanglanon nga relief goods.
Kini nahitabo human ang nasud nakaagom og kaylap nga kadaot gikan sa duha ka linog. Giangkon usab ni Raikes nga ang pagpadala og tabang usa ka dakong hagit tungod sa kasamtangang kahimtang sa imprastraktura sa Venezuela.
Tungod sa kadaot sa pangunang tugpahanan sa nasud, lisod kaayo ang pagpasulod og mga suplay. Sa umaabot nga mga adlaw, ang mga team sa IRC mag-focus sa paghatud sa mga batakang panginahanglan sama sa pagkaon, limpyo nga tubig, ug temporaryo nga puy-anan sa mga apektadong residente, ingon man ang paghatud sa mga kagamitan medikal sa mga lokal nga pasilidad sa panglawas.
Sa pagkakaron, daghang mga ospital sa nasud ang nag-antos usab sa grabe nga kakulang sa mga kritikal nga suplay sa medikal, samtang duha ka daan nga ospital sa Caracas ug La Guaira hingpit nga nahugno tungod sa kusog sa linog.
Samtang, duha ka adlaw human sa katalagman, ang mga nakaluwas giluwas gihapon gikan sa mga kagun-oban sa Caraballeda, usa ka lugar sa estado sa La Guaira nga usa sa labing naapektuhan sa linog. Lakip sa mga swerteng naluwas mao ang usa ka indibidwal nga malampusong nakuha gikan sa nahugno nga unom ka andana nga bilding diin daghan ang namatay.
