Gipadayag ni Ombudsman Jesus Crispin Remulla nga buhaton sa iyang opisina ang tanang mahimo aron mabawi ang mga giingong ill-gotten wealth nga gitago sa United States.
Gisulti ni Remulla ang maong pahayag atol sa usa ka town hall meeting sa Washington, D.C., diin iyang gipasiugda nga dili na angay mahimong luwas nga tagoanan ang U.S. alang sa mga ilegal nga bahandi nga gikan sa Pilipinas.
Bisan pa niini, wala siya maghisgot og bisan unsang partikular nga kaso.
Gipaambit usab niya ang mga repormang gipasiugdahan sa Office of the Ombudsman, lakip ang pagpalig-on sa pakigtambayayong sa ubang nasud ug pagpalapad sa access sa mga serbisyo publiko.
Sa wala pa kini, mitambong si Remulla sa ika-7 Global Conference on Sustainable Development Goal (SDG) 16 sa punong-himpilan sa United Nations sa New York City, diin iyang gihisgutan ang giingong multi-billion peso nga korapsyon sa mga flood control project nga kasamtangang giimbestigahan sa Ombudsman.
