Gilimod sa kampo o defense team ni Vice President Sara Duterte ang alegasyon sa House prosecution panel nga ilang gikopya ang listahan sa mga testigo ug ebidensya alang sa umaabot nga impeachment trial.
Matod ni Atty. Michael Poa, tigpamaba sa kampo sa Bise Presidente, dili angay gamiton ang terminong “mirroring” o “adopting” aron ihulagway ang ilang gihimo.
Gipasabot ni Atty. Poa nga halos dungan nga napasa sa duha ka panig ang ilang pre-trial brief ngadto sa Senado niadtong Hunyo 15. Gipasiugda usab niya nga katungod ug prerogatibo sa depensa ug prosekusyon ang pagpili sa mga testigo ug dokumento nga ilang gustong ipresentar sa husgado.
Aron mapamatud-an nga wala sila nagsalig sa mga dokumento sa prosekusyon, gisalikway usab sa depensa ang hangyo sa prosekusyon alang sa hiniusang pagmarka sa mga ebidensya. Hinuon, ilang girekomendar nga bulag nga markahan ang mga dokumento aron masiguro ang pagkamabinantayon ug kahapsay sa proseso.
Dugang pa ni Poa, kon adunay ipasaka nga request, mosyon, o manifestation ang prosekusyon kalabot sa maong isyu, andam ang depensa nga motubag niini sumala sa hustong proseso ug balaod.
