Nag-isyu ang Sandiganbayan Fifth Division og arrest warrant batok kang Senador Jinggoy Estrada may kalabotan sa kasong plunder nga may giingong P573 milyones nga kickbacks gikan sa mga flood control projects niadtong 2025.
Ang maong warrant gi-isyu pipila ka adlaw human nakapiyansa si Estrada sa laing kasong graft, diin mibayad siya og P90,000 isip temporaryong kagawasan.
Sumala sa ulat, ang kasong plunder usa ka non-bailable nga kaso ug mahimong mosangpot sa pagkabilanggo hangtod sa tibuok kinabuhi kung mapamatud-an nga sad-an ang senador.
Kauban ni Estrada sa mga gipasanginlan ang kanhi DPWH Secretary Manuel Bonoan ug pipila ka mga opisyal sa DPWH-NCR nga giingong nalambigit sa iligal nga budget insertions ug payout scheme.
Kini na ang ikatulong higayon nga nahimong akusado si Estrada sa kasong plunder.
Niadtong 2001, gidakop siya may kalabotan sa jueteng scandal human mapatalsik ang iyang amahan nga si kanhi Pangulong Joseph Estrada, apan naabsuwelto siya niadtong 2007.
Niadtong 2014, nalambigit usab siya sa PDAF scam ug nakapiyansa niadtong 2017.
Bisan pa sa bag-ong warrant, mipadayag si Estrada nga wala’y basehan ang mga paratang ug naglaum siya sa patas nga pagdungog ug hustisya.
Giingon sa iyang kampo nga gamiton nila ang tanang legal nga paagi aron kuwestiyonon ang kaso ug ipakita ang mga ebidensyang makapamatuod sa iyang pagka-inosente.
