SARANGANI- Gipadayag ni Alabel Mayor Lilibeth “Ybing” Salarda ang iyang dako nga kalipay ug pasalamat sa malampusong pagsaulog sa Sarangani Bay (Sarbay) Festival 2026, diin kini ang pinakaunang higayon nga ang maong sikat nga okasyon gihimo sa ilang lungsod sa Alabel, partikular na sa Ladol Beach.
Sumala ni Mayor Salarda, ang maong desisyon nahiuyon usab sa sugyot ni Governor Ruel Pacquiao aron mas makadaginot sa badyet taliwala sa giatubang nga krisis, ug iyang namatikdan nga mas luag ug dako ang dapit sa Ladol kon itandi sa ubang mga baybayon.
Mapasalamaton usab ang mayor sa tanang mipartisipar ug misuporta sa nagkadaiyang aktibidad sama sa fun run ug tree planting, samtang iyang gipasalig nga andam ang lokal nga kagamhanan sa Alabel nga modawat pag-usab sa hagit sa mosunod nga mga tuig aron mas mapalambo pa ang maong selebrasyon.
