Mihangyo ang Office of the Ombudsman sa Senado nga itugyan ang kopya sa CCTV footage may kalabotan sa insidente sa pagpamusil nga nahitabo niadtong Mayo 13 sulod sa building sa taas nga kapulungan.
Sumala kang Ombudsman Jesus Crispin Remulla, kabahin kini sa lahi nga imbestigasyon sa iyang opisina aron matino ang tibuok detalye sa maong insidente.
Gipangayo usab sa Ombudsman ang mga video footage nga nakuha sa pipila ka media personnel atol sa nahitabong pinusilay.
Naglaum si Remulla nga walay mahitabong cover-up sa kaso.
Kauban niini, gi-anunsyo usab ang unom ka bulan nga preventive suspension batok kang Senate Acting Sergeant-at-Arms Mao Aplasca samtang nagpadayon ang imbestigasyon.
Una nang miangkon si Aplasca nga nipabuto siya og warning shot human matod pa niya makumpirmar ang presensya sa mga operatiba sa National Bureau of Investigation (NBI) sa GSIS wing sa Senado.
Apan, gipatin-aw ni NBI Director Melvin Matibag nga wala silay mga tao sulod sa Senado sa dihang nahitabo ang insidente.
Nabatyagan usab nga sila Aplasca ug Senador Ronald “Bato” dela Rosa parehong miyembro sa Philippine Military Academy (PMA) Sinagtala Class of 1986.
Sa wala pa nahimong Senate Sergeant-at-Arms, nanilbi si Aplasca isip retiradong Police Major General human siya ma-nominate sa posisyon ni Bato niadtong 2025.
