Gibalibaran sa Korte Suprema ang hangyo alang sa Temporary Restraining Order (TRO) ug status quo ante order nga nagtinguha nga pugson ang Senado ug ang Senate Blue Ribbon Committee nga tipigan ug ipagawas ang mga orihinal nga draft report sa ilang imbestigasyon sa giingong anomalosong flood control project.
Imbis nga magpagawas og TRO, gimando sa Korte Suprema ang Senate Blue Ribbon Committee, nga kaniadto gipangulohan ni Senador Panfilo “Ping” Lacson, ug ang mga miyembro niini nga sila Senators Juan Miguel Zubiri, JV Ejercito, ug Sherwin Gatchalian, nga mosumite sa ilang komento o pagpasabot sulod sa 15 ka adlaw.
Ang mga abogado nga sila Eldrige Marvin Aceron, Sikini Labastilla, ug Purificacion Bartolome-Bernabe maoy misang-at sa petisyon nga mandamus ug certiorari aron obligahon ang komite nga ipagawas ang wala pa ma-edit o kompleto nga bersyon sa draft partial report.
Apan, sumala sa komite, dili pa opisyal ang partial report ug kini protektado sa deliberative process privilege aron dili maapektuhan o mahadlok ang gawasnong diskusyon sulod sa gobyerno.
Matod usab sa mga petitioner, dili na mahimong gamiton sa komite ang maong pribilehiyo tungod kay dayag nang gihisgutan ug gipublikar ni Senador Lacson sa media ang sulod sa draft report, lakip ang rekomendasyon nga kasuhan og plunder ang pipila ka mga opisyal.
