Hugot nga gimonitor sa Department of Information and Communications Technology (DICT) ug ang Cybercrime Investigation and Coordinating Center (CICC) ang social media ug digital platforms human sa kagubot nga nahitabo sa Senado niadtong Miyerkules.
Sa usa ka video message niadtong Huwebes, si DICT Secretary Henry Aguda miingon nga subay sa ilang mandato, ang hugot nga pagmonitor pag-ayo sa mga post o content nga mahimong makaaghat og dugang kagubot o mokaylap og kapintasan.
Giawhag usab sa kalihim ang publiko nga magpabiling kalmado ug sigurohon nga ang impormasyon nga gipaambit gikan sa lehitimo o opisyal nga mga tinubdan, ug susihon una kini sa dili pa mokomento o mopaambit.
Dugang ni Aguda nga bisan kinsa nga mapamatud-an nga nakatampo o nakaaghat sa pagkaylap sa sayop nga impormasyon ug kapintasan online mahimong mag-atubang sa angay nga silot subay sa kasamtangang balaod.
