Gimando sa Senado ang citation in contempt sa mga personahe sa National Bureau of Investigation (NBI) nga giingong misulay sa pag-aresto kang Senador Ronald “Bato” dela Rosa sulod sa Senado.
Ang mosyon gisang-at ni Senador Joel Villanueva aron i-cite ang mga ahente sa NBI nga nalambigit sa insidente sa contempt ug ibutang sila sa kustodiya sa Senado. Ang mosyon giaprobahan dayon sa mayorya.
Sumala sa bag-ong Presidente sa Senado nga si Alan Peter Cayetano, gimandoan niya ang Office of the Sergeant-at-Arms nga ibutang ang mga indibidwal sa kustodiya sa Senado.
Dugang ni Cayetano nga mahimo silang mangayo og tabang sa Philippine National Police sa Pasay City aron ipatuman ang mando hangtod nga makahatag og pagpaklaro ang mga agents.
Base sa kuha sa CCTV, makita nga dali nga midagan si dela Rosa padulong sa plenary hall sa Senado aron kuno malikayan nga madakpan sa mga naggukod nga ahente sa NBI nga nagsul-ob og sibilyan.
Mitambong si Dela Rosa sa sesyon nga adunay samad ug dugo sa iyang wala nga tudlo. Sa plenaryo, nahimong emosyonal ang senador samtang gisaysay niya ang insidente ug ang giingong pagsulay sa mga ahente nga pugngan siya sa pagsulod sa Senate building.
