Nagpadala ang Iran og proposal ngadto sa Estados Unidos, pinaagi sa tigpatunga nga Pakistan, nga nagtinguha sa pagwagtang sa giyera sa lain-laing bahin sa Middle East.
Sa ilang sugyot, giinsistir sa Iran ang pagtangtang sa mga Office of Foreign Assets Control (OFAC) sanctions sa pagbaligya sa Iranian oil sulod sa 30 ka adlaw ug ang paghunong sa naval blockade sa Amerika sa ilang mga pantalan.
Sumala sa mga report, apil sa hangyo sa Iran ang pagdumala sa Strait of Hormuz kon matuman sa US ang pipila ka mga commitment, nga wala na gipiho.
Apan pinaagi sa iyang Truth Social platform, kusgan nga gisupak ni US President Donald Trump ang counterproposal sa Iran.
Matod ni Trump, “totally unacceptable” o hingpit nga dili madawat ang mga kondisyon nga gibutang sa Iran aron matapos ang giyera.
Nagpasidaan usab ang Iran nga dili kini mopugong sa pagbalos batok sa bisan unsang bag-ong pag-atake sa Amerika ug dili motugot sa pagbutang og dugang nga foreign warships sa Strait of Hormuz.
Sa usa ka pamahayag, gipasiugda ni Iranian President Masoud Pezeshkian nga dili sila moyuko sa kaaway, ug ang pakig-dialogo o negosasyon wala magpasabot og pagsurender o pag-atras.
