Nagkita karong adlawa si Presidente Ferdinand Marcos Jr. ug ang bisitang Presidente sa Paraguay nga si Santiago Peña aron mapalig-on ang relasyon tali sa duha ka nasud sa pamatigayon, pamuhunan, ug agrikultura.
Si Peña miabot sa Pilipinas kaniadtong Mayo 10 gikan sa Taipei ug giabi-abi sa mga opisyal sa gobyerno sa Ninoy Aquino International Airport.
Sa wala pa ang meeting sa Malacañang, naghalad siya og korona sa Luneta isip kabahin sa opisyal nga seremonya.
Sumala sa Malacañang, ang duha ka lider gilauman nga mopirma og mga kasabutan nga mopalapad sa kooperasyon sa nagkalain-laing sektor.
Si Peña miingon nga ang Paraguay nakakita sa Pilipinas isip usa ka “interesting market” sa Asya, labi na sa konteksto sa Capricorn Bi-Oceanic Corridor nga magkonekta sa Brazil, Paraguay, Argentina, ug Chile.
Ang pagbisita ni Peña mao ang una sukad sa pagkatukod sa diplomatikong relasyon tali sa Pilipinas ug Paraguay niadtong 1962, ug nakita nga nag-abli sa usa ka bag-ong relasyon tali sa duha ka nasud.
