Ni-luwat si Atty. Nicholas Kaufman isip lead defense counsel ni kanhi Presidente Rodrigo Duterte sa International Criminal Court (ICC) human matapos ang iyang usa ka tuig nga kontrata niadtong Marso 31, 2026.
Sa pag-resign ni Kaufman sa ICC nga gipetsahan Mayo 8, iyang giingon nga siya ug si Duterte nagkasabot nga tapuson ang ilang propesyonal nga pakig-alayon.
Ang kanhi presidente gikataho nga mipili usab og bag-ong abogado aron modumala sa iyang depensa sa nagpadayon nga kaso sa krimen batok sa katawhan nga may kalabotan sa kontrobersyal nga ‘war on drugs’ sa iyang administrasyon.
Sumala ni Kaufman, nakigsulti na siya sa bag-ong legal counsel ni Duterte ug iyang gipasalig nga iya dayong atimanon ang kaso, lakip na ang pag-atubang sa sunod nga husay sa ICC nga gikatakda sa Mayo 27, 2026.
Gipasalig ni Kaufman nga ang mopuli nga legal counsel sa kanhi presidente adunay igong kasinatian sa ICC aron ang pag-uswag sa kaso ni Duterte dili maapektuhan o malangan.
Kauban sa iyang pag-resign, nangayo usab si Atty. Kaufman og pormal nga pagtugot gikan sa ICC nga mo-withdraw isip abogado, subay sa proseso ug regulasyon sa korte.
Gawas niini, ang tanang impormasyon nga may kalabotan sa kaso sa kanhi presidente magpabiling kompidensyal bisan human matapos ang propesyonal nga relasyon ni Kaufman niini.
Hangtod karon, wala pa’y gipagawas nga pahayag ang kampo ni Duterte bahin sa identidad sa bag-ong lead defense counsel niini.
