Naghatag og mensahe ang kanhi PNP chief ug kasamtangang MMDA General Manager nga si Nicolas Torre III ngadto sa kanhi Pangulong Rodrigo Duterte taliwala sa kaso nga iyang giatubang nga crimes against humanity sa International Criminal Court (ICC).
Sumala ni Torre, mopatigbabaw ang hustisya sa katapusan ug nanghinaut siya nga mapalaran ug anaa sa maayong kahimtang ang kanhi pangulo.
“Justice will prevail in the end. I wish him luck, and I wish him well,” mensahe ni Torre.
Hinumdoman nga si Torre ang nanguna sa pag-aresto sa kanhi Pangulo sa dihang siya pa ang hepe sa PNP Criminal Investigation and Detection Group (PNP-CIDG) niadtong Marso sa miaging tuig.
Niadtong Miyerkules, gipamatud-an sa ICC Appeals Chamber judges ang ilang hurisdiksiyon sa crimes against humanity case batok sa kanhi Pangulong Rodrigo Duterte.
Tungod niini, giisip sa Appeals Chamber nga “moot” o wala na’y kapuslanan ang hangyo sa depensa alang sa dayon ug walay kondisyon nga pagpagawas sa kanhi pangulo.
