GENSAN – Gidayeg ni Rajah Dominic Datahan Magarin, Bombo International Correspondent sa Thailand, ang epektibong sistema sa kagamhanan sa Thailand sa pagpugong sa pagsaka sa presyo sa petrolyo taliwala sa krisis sa lana sa tibuok kalibutan.
Sumala ni Magarin, nagpabilin nga lig-on ang presyo sa lana sa maong nasod nga nagdula lamang sa 29.25 hangtod 29.29 Thai Baht matag litro tungod sa ilang Thailand’s Oil Fuel Fund, diin ang gobyerno mismo ang nagadikta sa presyohan aron mapanalipdan ang mga konsumidor batok sa pagpahimus sa mga negosyante.
Samtang nagkagubot ang ubang kanasoran sa mahal nga gasolina, gipanghimakak ni Magarin nga adunay “panic” sa Thailand tungod kay duna silay igong reserba nga molungtad og 95 hangtod 100 ka adlaw, butang nga dako og tabang sa mga mag-uuma aron dili mosaka ang presyo sa mga batakang palitonon ug magpabilin nga normal ang dagan sa ilang ekonomiya.
