Nagpahibalo ang Pre-Trial Chamber sa International Criminal Court sa pagpanguna ni Judge Iulia Antoanella Motoc nga mahibalan sa sulod sa 60 ka adlaw ang desisyon kung ipadayon ba ang kaso batok kang kanhi Presidente Rodrigo Roa Duterte ngadto sa Trial Chamber o ibasura kini, pagkahuman sa upat ka adlaw nga confirmation of charges nga nagsugod kaniadtong Febuary 23 2026
Gipresentar sa prosecution ang ilang ebidensya ug testimonya aron suportahan ang alegasyon sa crimes against humanity, samtang gipanghimakak sa depensa ang mga sumbong ug giingong kulang ang basihanan sa kaso. Ang confirmation of charges usa ka kritikal nga hugna sa ICC kay dinhi pagatan-awon sa korte kon adunay “substantial grounds to believe” nga nakahimo og krimen ang akusado.
Ang 60 ka adlaw nga paghulat naghatag og panahon sa mga huwes sa pagrepaso sa tanang ebidensya ug legal nga argumento. Kon makit-an nga igo ang basihanan, ipadayon ang kaso ngadto sa pormal nga paglilitis; kung dili, posible kining ibasura.
Samtang naghulat sa desisyon, nagpabilin ang diskurso sa publiko—adunay nagpadayon sa pagsuporta sa kanhi pangulo, samtang adunay usab naglaum nga matuman ang hustisya. Ang pinal nga desisyon sa ICC gilauman nga mahimong usa ka mahinungdanong yugto sa kasaysayan sa nasud.
