Nihimo ug kasaysayan ang 16-time Grammy award winner nga si Bruno Mars human niya natala ang Guinness World Record alang sa pinakadakong konsiyerto sa usa ka video game.
Niadtong Enero 17, anaa sa 12,862,161 ka dungan nga mga tumatan-aw ang midagsa sa Roblox game nga “Steal a Brainrot” aron masaksihan ang iyang virtual performance.
Nalabwan niini ang miaging record holder nga si Travis Scott, kinsa nakadani og 12.3 milyon nga mga tumatan-aw sa iyang Fortnite event niadtong 2020.
Tungod sa daghang aktibong mga tigpaminaw sa platform, nalabwan pa gani ni Bruno Mars ang tibuok populasyon sa Sweden.
Sa dula, si Bruno mipakita isip usa ka virtual avatar ug gipasundayag ang iyang bag-ong single nga “I Just Might” ug ang classic hit nga “Locked Out of Heaven.”
Gawas sa musika, ang iyang limited edition in-game character nga gitawag og “Brunito Marsito” usa usab ka hit, diin ang mga magdudula nag-download niini og sobra sa 5.4 milyon ka beses.
Ang “Steal a Brainrot” usa ka sikat nga Roblox game nga inspirado sa capture-the-flag mechanics ug Italian internet humor. Kini ang unang higayon nga adunay gipahigayon nga pop-up concert sa usa ka celebrity sa dula, nga nagpalig-on sa reputasyon sa Roblox dili lamang isip usa ka gaming platform apan usa usab ka music venue.
Sumala ni Jessica Meehan sa Roblox, kini usa ka pruweba nga ang musika adunay gahum sa paghiusa sa mga komunidad sa virtual nga kalibutan sa wala damha nga mga paagi.
